الدنيا بدونك و لا شي / بقلم محمود دعاس ابو سلطان

 ( الدنيا بدونك ولا شي )

يا سيدي للحين أنا ما فهمتك

مرت سنين ومشكلتنا كما هي

أحيان تشعرني بأني ملكتك

وأحيان تشعرني بأني ولا شيْ

وإن قلت كلمة ليه ولاّ سألتك

غرقتني في بحر ظلمتْكْ والضّي

وأنا الذي بالقلب والعين شلتك

مثل الذي شايل على كفه الميْ

حيّرتني ويا ليتني ما عرفتك

أهواك وأهوى ديرتك وأعشق الحي

بمْجرّد التفكير بأنّي هجرتك

أشعر وكنّه ما بقى عِرْق بي حي

إقسى على كيفك وأنا إن عذلتك

لولا هجير الشمس ما نعشق الفيْ

يكفيني إني لو بعيني حضنتك

أحلامك ثقيله على رموشي شوي

وأقول أنا مأسورك اللي أسرتك

قلبك مثل مالطير في قبضة يدي

لكن أحبك وإن أنا ما فهمتك

اتصوّر الدنيا بدونك ولا شي

محمود دعاس أبو سلطان