دموع بتجري / بقلم الشاعرة عزه موسى السعدني
دموع بتجري
___
دمعى أنا جارى
على خدى وجارحنى
قايد ف ليل نارى
وقلبى مايريحنى
سهرت ليلى اراضيك
تقوم إنت تدبحنى
والله لو حن إليك
قلبى وحلفنى
راح أفوته ولا اسأل فيه
من بعد ما جرحنى
قلبك وظن فيه
السؤ ولا صارحنى
يلا عليه العوض
ف حبى وتنهيدى
وأنا كل يوم اتظلم
زيدى يا دموع زيدى
إملى حياتى ألم
قيدى يانار قيدى
وإكوى قلبى كمان
ودمي يغلي ف وريدى
خليه ينزف ندم
على سهري وتنهيدى
فيا جراح يمكن
قلبى يبطل بقى
يعشق ف قتاله
ولا يوم يطلب لقى
ولا يغنى مواله
أبعد أنا عنه
وأنسى يوم حبيت
قلب غدر بيا
ودموعي ف عنيا
وشربت مر الكاس
وزاد الضنى فيا
زيدينى يا دموعى
وإنت سبب لجراح
وقلبى يوم ما إرتاح
وصبح لروحى جراح
أنا قولت هتعيدى
وتنسيى بقى دموعى
عزه موسى السعدنى
تعليقات
إرسال تعليق